JR Borja General Hospital sa Cagayan de Oro Ma Bag-o Tungod sa ₱50-Million nga Proyekto ni Congressman Suan

Cagayan de Oro City, Abril 10, 2025_ Sa usa ka dakong inisyatibo aron mapaayo ang serbisyo sa panglawas sa Cagayan de Oro, gipahibalo ni Congressman Lordan Suan sa 1st District ang usa ka ₱50-million nga proyekto aron i-modernize ang JR Borja General Hospital, nga mas nailhan isip city hospital. Ang maong renovation nagtinguha nga matubag ang nagkadako nga panginahanglan sa healthcare sa komunidad pinaagi sa pagpalambo sa mga pasilidad ug serbisyo.

Gipahayag ni Assistant District Director Bert Amplayo, nga mao ang tigpamaba ni Congressman Suan, ang detalye sa proyekto, nga naglakip sa renovation sa emergency room, delivery ug labor rooms, post-partum care area, ug OB-ER complex.

Apil usab sa renovation ang pag-upgrade sa nurse stations aron masiguro nga ang mga pasyente, labi na kadtong nanginahanglan sa maternal ug emergency care, makadawat ug dekalidad nga atensyong medikal sa mas epektibo ug user-friendly nga paagi.

Usa ka importante nga aspeto sa renovation mao ang pag-modernize sa kitchen facilities sa ospital. Ang bag-ong kusina maghatag dili lang ug mas maayong kalidad nga pagkaon alang sa mga pasyente ug staff, apan maghatag usab ug dugang suporta sa mas daling pag-ayo ug recovery.

“Ang maong proyekto usa ka matawag nga cornerstone sa panan-aw ni Congressman Suan nga magahatag og world-class nga healthcare alang sa katawhan sa dakbayan,” matod pa ni Amplayo. Dugang pa nga “buot gayud ni Suan nga masiguro ang iyang mga constituents nga adunay access sa labing maayong serbisyo medikal.”

Apan, aminado si Amplayo nga ang inisyatibo adunay mga hagit. Masayran nga ang pipila ka mga proyekto ni Congressman Suan kaniadto wala gayud na-implementar tungod sa gi ingong political interference. Sa pipila ka higayon, ang Cagayan de Oro local government unit wala magpakita ug kooperasyon, ug ang uban sa mga proyekto ni Suan gipulihan hinuon sa mga LGU-led nga inisyatibo sa parehas nga mga lugar. Bisan pa niini, gipasiguro ni Amplayo sa publiko ang dedikasyon ni Suan nga tapuson kini nga proyekto.

“Kini nga renovation usa ka prayoridad, ug determinado si Congressman Suan nga malampasan ang bisan unsang hagit aron mahatag kini nga importante nga kausaban alang sa komunidad" dugang ni Amplayo.