LGUs dako’g papel sa pagpatuman sa Universal Health Care Program

LGUs dako’g papel sa pagpatuman

sa Universal Health Care Program

DAKO ang papel sa local government units sa pagpalambo sa healthcare system sa usa ka lokalidad aron makab-ot ang ‘available, accessible and affordable’ nga healthcare system subay sa katuyoan sa Universal Health Care (UCH) Program sa nasod.

Kini ang pamahayag ni Dr. Mae Yap, head sa Accreditation & Quality Assurance Section sa Philippine Health Insurance Corporation Northern Mindanao, atol sa Social Health Insurance Education Series alang sa mga sakop sa prensa, Oktubre 7.

Sumala pa ni Dr. Yap, kinahanglan nga ang mga lideres sa LGUs andam ug adunay kaakuhan sa pagpalambo sa paghatag og batakang serbisyo sa panglawas.

Tipik sa UHC ang pagpatuman sa Philhealth KonSulTa (Konsultang Sulit at Tama) package provider o ang expanded primary care benefits nga nakatutok sa outpatient health services sa katawhan.

Ubos sa KonSulta package, ang usa ka Philhealth member ug dependents niini mahimong magpa-konsulta sa doctor, makapailawom sa 13 select laboratory tests ug maka-avail sa 21 drugs & medicines nga napili sa KonSulTa provider facility kung asa siya nag-parehistro.

Uban sa hugot nga suporta sa Philhealth- X sa pagpangulo ni VP Delio Aseron II, ug pag-abag sa Department of Health Regional Director Dr. Jose R. Llacuna Jr, karong tuiga unom ka mga health facility nga gidumala sa kagamhanang lokal sa Cagayan de Oro pinangulohan ni Mayor Rolando ‘Klarex’ Uy ang na-accredit isip KonSulTa provider sama na lang sa City Health Office nga pormal nga gibuksan karong adlawa, Lumbia infirmary, ug mga health centers sa Carmen, Lapasan, Nazareth ug Tablon.

Dumduman lakip sa Rise CDO development agenda ni Mayor Klarex ang pagpalambo sa healthcare system ingon man ang hugot nga suporta sa Universal Health Care program.

(AGP/Photos by Rod Constantino/CIO)