MGA PASYENTE SA HOUSE OF HOPE GIATIMAN SA ADMINISTRASYON NI MAYOR KLAREX UY

Giatiman ug wala gipasagdan sa administrasyon ni City Mayor Rolando ‘Klarex’ Uy ang House of Hope, usa ka custodial psychiatric care facility nga nahimutang diha sa may Upper Palalan, barangay Lumbia ning syudad.

Kini ang gitin-aw ni Dr. Michael June Perez, Acting Chief of Hospital sa JR Borja General Hospital (JRBGH), agi’g tubag sa alegasyon nga matud pa nabalda ang operasyon sa maong mental health facility tungod sa kakulangon sa pundo.

Gipasabot ni Dr. Perez nga ang nahisgutang custodial psychiatric care facility ‘fully functional and operational’ karon, ilabina nga hapsay ang pagpadagan sa mga staff sa maong facilidad.

Nasayran nga ang ‘full administrative, managerial and operational functions’ gipailawom na sa JRBGH sugod niadtong Enero 2023 pinasikad sa usa ka Memorandum of Agreement kon MOA nga gipirmahan tali ni Mayor Klarex Uy ug Monsignor Jose Alan P. Pulgo, ang Chairperson sa Board of Trustees sa House of Hope Foundation, Incorporated.

Misaksi sa pagpinirmahay sa MOA mao sila si Cagayan de Oro Archbishop Most Reverend Jose A. Cabantan, JRBGH Acting Chief Dr. Perez ug JRBGH overseer Dr. Ferdinand D. Miranda.

Sa pagkakaron, adunay 53 ka mga pasyente nga giatiman sa 36 ka mga staff sa JRBGH nga gilangkoban sa mga doktor, nurse, nursing attendant, psychometrician, utility worker, driver ug cook.

Samtang, giklaro ni Dr. Perez nga financial assistance ug dili budget para sa operations sa House of Hope ang pasabot sa pamahayag ni Msgr. Eutiquiano ‘Tex’ Legitimas, ang Co-Founder sa HOHFI atol sa usa ka news conference sa miaging adlaw.

Pinasikad sa MOA, mohatag ang kagamhanan ning syudad og P3-million annual financial assistance alang sa ‘apostolic ug missionary duties’ sa House of Hope, ilabina ang pag-atiman sa mga pasyente nga mahibalik na sa komunidad kon ‘community reintegration’ ubos sa ilang after-care program.

Namahayag si Dr. Perez nga nahatag na sa syudad ang 3 million pesos niadtong milabay’ng tuig alang sa tuig 2021, ug andam na usab ang laing 3 million pesos alang sa tuig 2022, apan nalangan kini tungod sa liquidation sa House of Hope.

Padayon ang koordinasyon sa kagamhanan ning syudad pinaagi sa JRBGH tali sa mga kadagkoan sa Archdiocese of Cagayan de Oro ug House of Hope Foundation, Inc. aron matubag sa hingpit ang mga panginahanglan sa mga pasyente nga anaa karon giatiman sulod sa facilidad.