Oca:"Inhustisya Ang Wala Pagtibawas Sa Puerto Market"

Ni Mona Lagbas

Abril 11, 2025,Cagayan de Oro City_Sa pagpahigayon sa Pakighinabi Serye sa Team Padayon OSM Biyernes, si kanhi mayor Oscar Moreno mideklarar nga usa ka inhustisya ang wala pagtibawas sa pagtukod sa Puerto market ubos sa kasamtangang lokal nga administrasyon.

Matud pa ni Attorney Moreno, grabe nga perwisyo sa katawhan sa Puerto ang pagpa-undang sa maong proyekto. Dugang pa ni Moreno, usa kini nga suliran nga naghagit kaniya nga magpapili subli isip mayor karon Mayo 12.

Gipadayag ni Moreno nga, matud pa, ang contractor dili gabayran sa kasamtangang lokal nga pangagamhanan sa dakbayan busa dili ipadayon sa contractor ang pagtibawas sa maong proyekto.

"Gapaningil sila karon sa mga vendors ug mas dako pa ang ilang gapaninglon kaysa sa una. Asa ang kwarta gapaingon? Grabe gyud kaayo nga pangwarta ilang gibuhat, makalilisang kini, delikado ni sila magabaan sa katawhan"', pamahayag pa ni Moreno.

Kuyog sa maong pakighinabi sila si komentarista Zaldy Ocon nga magpapili isip Bise Mayor, si kasamtangang konsehal Rustico Ian Achas nga magpasubli isip konsehal ug sila ni Misamis Oriental board member Boboy Sabal, si magtutudlo Ike Olandesca, si Jasmin Borja si Doctor Jess Jardin ug si kanhi Police Major Maricris Mulat, nga magpapili usab sa pagka-kagawad sa ikaduhang distrito sa dakbayan ubos sa Team Padayon OSM.