Team Padayon OSM Nakighimamat Sa Mga Muslim Religious Ug Youth Leaders

Ni Mona Lagbas

April 10, 2025, Cagayan de Oro City_Isip kabahin sa Pakighinabi Serye sa Team Padayon OSM, si kanhi mayor Oscar Moreno nakighimamat sa mga ulama kun Muslim priests ug sa mga Muslim youth leaders karon adlawa.

Gipasabot ni Attorney Moreno nga ang iyang umalabot nga administrasyon andam kanunay sa pagpaminaw ug moaksyon sa mga issues ug concerns sa nagkalain-lain nga mga sector sa dakbayan, lakip na ang mga lideres sa mga relihiyon o kultura.

Nakipagpulong usab si Moreno sa Bise Presidente sa Northern Mindanao Ulamas League nga si Abdul Nasser M. Abubacar ug nahisgutan ang mahitungod sa mga balaan nga mga espasyo alang sa mga Muslim, hilabi na sa mga pampublikong mga lugar sama sa mga tunghaan, mga buhatan sa gobyerno ug mga shopping malls.Apil pud sa ilang gituki ang mga oportunidad alang sa mga Muslim nga negosyante nga wala'y, matud pa, diskriminasyon.

Si Moreno nagpasalig nga sa umalabot niya nga administrasyon, atimanon niya ang mga suliran sa mga Muslim sa dakbayan ug sa ilang mga dumodoong sa Cagayan de Oro.

Dugang pa ni Moreno nga walay mapihig nga sector sa iyang pagbalik isip mayor sa Cagayan de Oro City. Mao kini ang gipahingusgan niya nga hingpit nga "inclusive governance" sa Team Padayon OSM.

Sa mao gihapong pakighinabi, nagpadayag usab sa ilang pagpakabana sila si Ike Olandesca, Jasmin Borja ug Maricris Mulat nga magpapili isip mga kagawad sa ikaduhang distrito sa dakbayan.

Mapasalamaton si Moreno sa mga Ulama ug mga Muslim youth leaders sa ilang suporta kaniya sa umalabot nga piliay karon Mayo 12.